Maryamu: Aya ga Talikai

Sai Ubangijinta Ya karve ta da kyakkyawar karva, kuma Ya yi mata kyakkyawar tarbiyya, kuma Ya danqa renonta a hannun Zakariyya; duk lokacin da Zakariyya ya shiga wurinta a xakin ibada, sai ya sami abinci a wurinta, sai ya ce: “Ya ke Maryamu, wannan daga ina kika samu?” Sai ta ce: “Wannan daga Allah ne; lalle Allah Yana arzurta wanda Ya ga dama ba tare da lissafi ba.”

Annabi Zakariyya ya kasance a duk lokacin da ya shiga wurin Nana Maryam yana samun abinci a wurin ta. A lokacin da ya tambaye ta game da wannan abincin a ina take samun sa, sai ta ba shi amsa cikin daxin rai da cewa, “Wannan daga Allah ne”. Ta haka labarin ta ya fara a cikin Alqur’ani...da zuciyar da ta san cewa kyautar Allah tana iya zuwa ta inda mutum bai yi tsammani ba.

Kuma ka tuna lokacin da mala’iku suka ce: “Ya ke Maryamu, lalle Allah Ya zave ki, Ya kuma tsarkake ki, kuma Ya zave ki a kan sauran mata na talikai “Ya ke Maryamu, ki yi xa’a ga Ubangijinki, kuma ki riqa yin sujada, kuma ki riqa yin ruku’u tare da masu ruku’u

Alqur’ani yana magana da Nana Maryam da kalmomi bayyanannu cewa: “lalle Allah Ya zave ki, Ya kuma tsarkake ki”. Matsayin da ta samu ba ta same shi ba ne saboda girman dangantakar ta ko dukiyar ta, a’a ta same shi ne ta dalilin tsarkaka da imani da ibada. A cikin Alqur’ani, Nana Maryam mace ce da Allah ya zava ya xaukaka matsayin ta a kan sauran mata na talikai.

Ka tuna lokacin da mala’iku suka ce: “Ya ke Maryamu, lalle Allah Yana yi miki albishir da wata kalma daga gare shi, sunansa Almasihu Isa xan Maryamu, mai daraja a duniya da lahira, kuma yana cikin bayi makusanta “Kuma zai riqa yi wa mutane magana tun yana cikin shimfixar jego da kuma lokacin da ya zama dattijo, kuma yana cikin salihan bayi.”

Labari ya zo mata tun kafin ai haifi Annabi Isa cewa “Sunansa Almasihu Isa xan Maryamu”. Kuma Alqur’ani ya siffanta shi da cewa shi mai daraja ne a duniya da lahira kuma yana cikin bayi makusanta. Saboda haka ba zai yiwu ka san irin kallon da Musulunci yake yi wa Annabi Isa Almasihu ba ba tare da ka karanta qissar Nana Maryamu ba.

Kuma ka ambaci (labarin) Maryamu a cikin (wannan) Littafi lokacin da ta qaurace wa mutanenta zuwa wani wuri a nahiyar gabas Sai ta saka shamaki tsakaninta da su (mutanen nata), to sai Muka aiko mata da Ruhinmu (shi ne Jibrilu) ya bayyana gare ta da surar daidaitaccen mutum Ta ce: “Lalle ina neman Allah ya tsare ni daga gare ka idan ka zamanto mai taqawa ne.” Ya ce: “Ni manzo ne kawai na Ubangijinki na zo don in yi miki baiwar xa tsarkakakke.”

Yayin da Nana Maryam ta ga wani baqon mutum a gaban ta, sai ya zamana farkon abin da ta fara faxa shi ne: “Lalle ina neman Allah ya tsare bi daga gare ka”. Ba ta san cewa wanda ya zo mata yana xauke da saqo daga Allah ba da kuma bushara ta samun xa tsarkakakke...yanayin tsoro...zai zama xaya daga cikin mafarar mafi shaharar qissoshin da suka danganci imani a tarihi.

Ta ce: “Ta qaqa zan samu xa, alhalin kuwa wani namiji bai tava shafa ta ba, kuma ni ban zamanto mazinaciya ba?” (Mala’ika) ya ce: “Kamar haka ne Ubangijinki Ya faxa (cewa): “Shi (wannan) mai sauqi ne a wurina, kuma don Mu mayar da shi aya ga mutane da kuma rahama daga gare Mu, kuma (yin haka) ya zamanto al’amari ne tabbatacce (rubuce a Lauhul-Mahafuzu).”

Nana Maryamu ta yi tambaya irin tambaya ta xabi’a cewa, ta yaya zan samu xa alhali wani mutum bai tava shafa ta ba? Sai amsa ta zo mata da cewa: “Shi (wannan) mai sauqi ne a wurina”. Don haka Alqur’ani ya ba da labarin yadda haihuwar Annabi Isa ta kasance “aya ga mutane da kuma rahama daga gare Mu”. Mu’ujiza ce da ba ta zamo ita ce mafi qololuwar abin da ake buqata ba a karan-kanta...sai dai don ta zamo alama ce ta kiran mutum da ya yi tunani.

Sai ta xauki cikinsa sannan ta (tafi) da shi wani wuri mai nisa Sai ciwon naquda ya tilasta mata zuwa ga kututturen dabino, ta ce: “Ina ma na mutu tun kafin wannan (abu ya faru), na kuma kasance yasasshiya, mantacciya!” Sai ya kira ta daga qarqashinta cewa: “Kada ki yi baqin ciki, haqiqa Ubangijinki Ya sanya qorama a qarqashinki

Alqur’ani bai tsoratar ba a yayin da raunin Nana Maryamu ya bayyana lokacin da raxaxin haihuwa ya zo mata ta ce: “Ina ma na mutu tun kafin wannan (abu ya faru). Sannan kira ya zo mata da cewa: “Ka da ki yi baqin ciki”. Hatta mace da Allah ya zava ta keto ta cikin wani yanayi wanda ta ji cewa ba za ta iya xaukar abin da ke cikinsa na tashin hankali ba.

“Ki kuma girgiza kututturen dabinon nan zai zubo miki da lubiyar dabino nunanniya “Don haka ki ci, ki sha, kuma ki kwantar da hankalinki; kuma duk mutumin da kika gani (ya yi magana da ke), sai ki yi nuni da cewa: “Na xauki alqawari ga Allah na kame bakina, ba zan yi magana da wani mutum ba yau.”

A cikin mafi tsananin lokuta da Nana Maryam ta kutso na jin raxaxi, kalmomin ba su zo a cakuxe ba: Girgiza kututturen dabinon, ki ci, ki sha, kuma ki kwantar da hankalinki. A nan Alqur’ani yana zana mana wani yanayi ne sauqaqqa daga rahama...wato buqatuwar mutum zuwa ga abin ci da nutsuwa da kwanciyar hankali ba su faku sun vuya daga ilimin mahaliccin sa ba.

Sai ta nuna shi; (sai) suka ce: “Ta qaqa za mu yi magana da wanda yake xan jariri cikin shimfixar jego?” (Isa) ya ce (da su): “Lalle ni bawan Allah ne, Ya ba ni littafi Ya kuma sanya ni Annabi “Ya kuma sanya ni mai albarka a duk inda nake, kuma Ya umarce ni da yin salla da kuma ba da zakka matuqar ina raye

Yayin da Annabi Isa ya yi magana a cikin zanin goyo, Alqur’ani ya naqalto mana farkon maganar da ya fara furtawa, wato “lalle ni bawan Allah ne...Kuma ya sanya ni Annabi”. Sannan ya yi maganar salla da albarka. Lallai yanayi ne da za a fahimci yadda Alqur’ani ya ba da hoto sa surar Annabi Isa Almasihu yake...kamar yadda Alqur’ani ya kawo.

(Ka tuna) kuma wadda ta tsare matancinta, sai Muka yi busa a cikinta daga Ruhinmu, Muka kuma sanya ta ita da xanta aya ga talikai

Allah Ta’ala yana faxa game da Nana Maryam cewa: “Wadda ta tsare matancinta”. Sannan ya faxa game da ita da xanta ya ce: “Muka kuma sanya ta ita da xanta aya ga talikai”. Girmama Nana Maryam a Musulunci a haxe yake da kamewar ta da kuma imanin ta, kuma haihuwar Annabi Isa aya ce da ta shallake zamanin ta da kuma wurin da ta rayu.

Da kuma Maryamu ‘yar Imrana wadda ta kiyaye matuncinta, sai Muka masa busa daga Ruhinmu, ta kuma gaskata ayoyin Ubangijinta da littattafansa, ta kuma kasance daga masu biyayya ga Allah

A wani wurin kuma, Alqur’ani ya dunqule magana a kan Nana Maryam cikin ‘yan kalmomi kaxan da cewa, kamammiya ce, mai gaskata kalmomin Ubangjinta ce da litattafansa kuma tana cikin masu yi masa xa’a, Allah Ta’ala ya ce, “ta kuma gaskata ayoyin Ubangijinta da littattafansa”. Wataqila wannan ne ya sa Alqur’ani bai ambace ta haka kawai ba, sai ya sanya ta ta zama abar koyi game da abin da ya shafi sha’anin imani.

• #
• #
• #

• #
• #
• #

• #
• #
• #

• #
• #
• #

• #
• #
• #

• #
• #
• #

• #
• #
• #

• #
• #
• #

• #
• #
• #

• #
• #
• #

• #
• #
• #

• #
• #
• #